現實中的黑夜之神

FACE 週刊
TE024-028 | 青雲路 | 青雲路 | 2008-08-20
標示關鍵字



現實中的黑夜之神






電影《黑夜之神》蝙蝠俠只會在夜晚出動打擊罪惡；現實中，每晚當你開行冷氣，在床上熟睡時，卻有不少「黑夜之神」揮着汗，趕在大家睡醒之前完成工作，讓社會順利運作。

　今次《青雲路》的3位被訪者，全是「黑夜之神」，晝伏夜出，如令食肆店鋪商場回復整潔的清潔員；為巴士、小巴、商場外牆、大型背景板一夜變身的廣告及海報裱貼師傅；確保全港晚上所有馬路正常運作的路政署工程監工。

CASE 1清潔員：「唔好怕污糟嘢！」

　葉先生 40歲

夜深人靜，陰盛陽衰，不少人會怕撞鬼，但在晚間擔任外圍清潔員的葉生，卻說這些事見怪不怪。「灣仔有間茶餐廳出咗名有污糟嘢，但接到order要去清潔都冇辦法，嗰晚我抹緊地，忽然間發現前面企咗個人，佢冇着制服，好明顯唔係同事，現場又唔會有其他人入到嚟。其實幾驚，但點驚都要做嘢，咪只好望向第二度當睇唔到，轉頭就唔見咗佢喇。」

　葉生的工作範圍包括清潔工廠大廈、寫字樓和零售鋪等，連埋天花板、地板同冷氣風口、玻璃同地毯都要清潔，幾污糟的地方都會接觸到。「有時接到case，話明係去洗血，嗰度啱啱發生兇殺案，但係都要去，心裏面一路話做嘢啫，我幫你清潔番呢度，對大家都有好處，有怪莫怪。所以做得呢行一定要有心理準備，唔可以怕污糟嘢！」葉生可說是身經百戰，見慣風浪。

4日唔瞓清潔店鋪

清潔員要在店鋪或寫字樓收工後，盡快進行清潔工作，好像手板眼見功夫好易做，葉生說有時都要開OT，「之前試過有間西餅連鎖店俾人收購咗，新老闆話要喺4日內清理好14間門市，準備重新開張。由於餅鋪有很多過期食物，而且時間太短，雖然公司有成10個人，都做到冇停手。有個同事嘅女朋友打嚟公司搵人，話唔見咗佢幾日，原來嗰位同事忙到唔記得打電話返屋企，佢又幾日冇瞓過，最尾嗰日仲攬住個抽氣扇瞓着咗添。」

　葉生說清潔也會有難度，「雨水帶有酸性，如果唔即時清潔，會喺鋪頭招牌表面上留低一條條嘅痕（行內俗稱淚痕），之後就抹唔甩。而醋都係有酸性嘅，如果滴落地板，好多時會損壞咗地板嘅表面，所以亦要即時處理。有時我哋清潔唔到呢啲污迹，啲客投訴，覺得我哋冇盡力，所以要好耐心同詳細咁講解原因，等佢哋明白。」

　清潔員屬體力工作，固然辛苦，但葉生卻不工作不舒服。「我同啲同事都做慣咗，如果一放大假，成個禮拜唔做嘢，留喺屋企，真係會病，唔係傷風感冒就呢度痛嗰度痛。所以我哋都幾鍾意返工，而且望住啲好乾淨嘅地方，會好有成功感。最怕接收到十分乾淨嘅地方工作，因為本身太乾淨，一啲都唔會顯得我哋做咗嘢，其實如果地方好污漕，好容易見功夫，所以乾淨嘅地方仲難搞。」

點樣入行？

清潔員入行條件有限，必需肯捱肯做，但葉生說近年好多年輕人都捱唔住。他說清潔行業好有前景，因為每行每業都需要，特別是食肆，所以對清潔員需求很大。

晉升階梯：

外圍清潔監督（3至4年升） $13,500

　↑

　外圍清潔科文（3至4年升） $10,000

　↑

　外圍清潔員 $7,500

CASE 2裱貼師傅：「夜晚趕工，要快手，仲要細心！」

　David 28歲

小時候一定會玩過貼貼紙，原來貼貼紙也可以發展成專業，好像裱貼師傅David的工作是裱貼商場外牆大型裝飾、燈箱招牌、巴士車身廣告及大型展覽館背景等。

　「我本身對廣告好有興趣，又覺得裱貼好神奇而入行，貼紙係可以無限大嘅，因為可以一張駁一張，駁到好長好長，我做過最大嘅就有成600平方呎，好似一間專業跳舞室咁大。由於我哋嘅size好有彈性，所以好多巴士、小巴甚至私家車都搵我哋裝飾或貼廣告。」

　在日間，通常不會看見David工作的，因為大部分工作時間均需在凌晨時分進行，減少對顧客的滋擾。「巴士小巴客通常急住要番架車，所以啲客夜晚收工會揸架車嚟，我哋就要即刻開工裱貼，客人第二朝就可以嚟攞番架車。」David說巴士最易貼，而小巴和私家車則有一定難度，「裱貼最難嘅係彎位同弧位，巴士啲線條比較簡單，彎位亦較少，會容易啲，貼3至4個鐘就得。如果貼Benz，通常要成7個鐘，因為要度好多位，車門同車嘅手柄位比較難就位。」

通宵工作極速執生

裱貼除了手工要好，還要有應變力。「其實好多大型嘅展覽都係用一至兩晚嘅時間嚟做裝飾，有一次喺酒店度做展覽，仲有一個鐘就夠鐘開場，個客人嚟睇吓做成點，一睇就大件事，原來串錯字，將個R串咗做N，唔係我哋搞錯，係個客串錯畀我哋，但係都冇理由畀其他人睇到咁醜o架，就即刻諗辦法，問酒店借白紙，即刻cut番個N字出嚟喺開場前10分鐘補番上去。雖然會有啲唔靚，但係都好自然，好彩都冇畀其他人發現。」雖然通宵工作，David仍能極速執生，客人都覺得好滿意。

　找David裱貼的客人很多，不同工作，總有不同難處。「有次接手人哋啲商場，點知上手慳錢，唔用『可易貼』嚟做裝飾，『可易貼』即係好容易搣番出嚟嘅貼紙，咁就好麻煩，你諗吓你平時要搣細細個嘅價錢牌都難搞啦，何況係咁大面積嘅商場。我哋用白電油係咁抹，用?刀幫手搣，搞咗好耐，時間長都唔係問題，但客人有時就唔明白，覺得我哋好慢，好彩同事接job嘅時候已經同客人解釋清楚，之後就算佢哋仲有疑問，我哋都要好詳細咁講解，佢哋先至會知道個情況，同埋個客以後就知道一定要用『可易貼』。」

　客人給予David的工作時間有限，如裱貼商場裝飾，最快都要等到晚上10點商場關門後才能動工，於早上6點前一定要搞妥，「做嘢要快手，仲要細心兼有耐性，好似要整走貼紙表面嘅泡泡，而貼貼紙之前仲要清理好頭髮或者任何小物件，唔係貼嘅時候會令到張貼紙突起咗，所以要好小心、好專注。」

點樣入行？

入行要由裱貼學徒做起，不需特別條件，學徒會由最簡單裱貼學起，慢慢再學高難度的技巧，如貼轉角位等。學徒一般3個星期就可以跟師傅出去工作；做2至3年就有機會升為裱貼師傅，到時仲可以接freelance增加收入。

晉升階梯：

裱貼師傅（2至3年） $11,000

　↑

　裱貼學徒 $7,000

CASE 3路政署工程監工：「返夜班要改生活習慣。」

　馮學禮 30+歲

「喂喂！莊士敦道有狗俾車撞死咗，你哋快啲嚟搞掂佢啦！」晚上野狗在公路上被車輾死，路政署的工程監工馮學禮收到市民電話，需要立刻處理，「我哋分早晚兩班，專負責晚班嘅同事連埋我總共有6個人，負責接收處理全香港晚上7點後，至早上9點前嘅公路投訴，當收到市民投訴，無論大小事件都要即時處理。包括處理山泥傾瀉覆蓋道路、路面損毀或出現坑洞、樹木傾倒阻礙馬路等，主要維持道路網絡暢通。每個路段都有唔同嘅承建商負責保養維修，遇到有狗屍嘅投訴，我哋會即刻通知有關嘅承建商，同趕去現場跟進，好似圍起案發現場，即刻處理狗屍，唔可以等到第二朝，因為會有臭味，滋擾到附近居民，亦會對馬路上嘅其他車輛構成危險。」

即時處理投訴事件

工程監工每星期都會輪班工作，每晚有2位職員留在中心，接市民投訴電話，並透過電腦及電視即時新聞監察路面情況。馮說當中有不少難忘事，「試過喺西貢村落發生冧樹事件，村民返唔到入村，啲小朋友又留晒喺村入面，我哋又驚影響西貢公路嘅交通，要好快咁搵到承建商嚟幫手，只係用咗一個鐘移開棵樹，啲村民好開心，衝返入村，發現啲小朋友全部都冇事，真係非常好彩。」

　有時政府部門在夜晚為各項工程趕工，總會引起市民投訴，「處理呢啲投訴有時都幾難做，有啲市民會不停打嚟投訴，有次凌晨12點，係水務署轉介個案，市民投訴維修人員喺公路修理水喉時發出大量噪音，我哋要好耐心咁解釋畀佢聽點解會進行工程及各項程序，結果嗰電話講咗兩個鐘，好彩佢最後都好滿意，仲多謝我哋添，嗰一刻嘅成功感好大，覺得呢份工可以幫到人。」



返晚班的人，還要坐在辦公室內工作，首先要學懂對抗睡魔，「初初返工可能會唔慣，都會覺得眼瞓，不過好快會適應，基本上每晚都要處理投訴，不停處理事件，即使有時比較空閒，我哋都要睇住24小時即時新聞，如果有咩事發生，會主動去了解情況。」說到工作帶來的難處，必定是作息時間與家人朋友不同，「要同家人朋友聚會真係幾難夾，冇辦法啦，只可以互相遷就，佢哋會體諒嘅。我做咗呢份工3年，都要改好多生活習慣，好似我以前會同朋友一齊踢足球，?家就改咗去跑步；同事以前會同朋友夾band玩音樂，?家會留係屋企聽音樂。自己都好鍾意份工，呢啲改變值得嘅。唔好以為我哋會犧牲好多嘢，同樣我哋都得到唔少方便，好似返工唔使同人迫車，人哋返緊工我都可以去行街。」

點樣入行？

想夠資格入職做路政署工程監工，就要先去報讀IVE的土木工程高級文憑，而文憑有分兩年制同四年制，最低的收生資格是完成中五或持有中專證書。最初入職會由二級監工做起，而二級監工及一級監工，要先申請投考助理工程督察，才可升至工程督察及高級工程督察等職位。

晉升階梯：

總工程監督 $60,535 - $68,915

　↑

　高級工程督察 $50,475 - $57,875

　↑

　工程督察 $32,055 - $48,400

　↑

　助理工程督察 $18,885 - $30,615

　↑

　一級監工 $17,805

　↑

　二級監工 $14,890