壹週刊 | 2014-02-20
雜誌 | A070-073 | 時事 | 非常人語
G.E.M.在內地電視節目《我是歌手2》一唱成名，內地網民奉她為女神，港人一邊讚她為港爭光，一邊又譏大陸人只鍾意嗌歌。
看到G.E.M.在內地發圍，梁翹柏感懷：「唱歌咁好，又靚女，彈琴又叻，又識作曲，咁叻嘅人喺香港好難生存，香港歌手係需要有啲缺陷先受歡迎。」
「香港人太膽小，捉摸唔到嘅嘢就會好怕。」
梁翹柏是香港幕後音樂人，兩季《我是歌手》音樂總監。
他二十多年前做過幕前，唱片銷情慘淡，此後轉投幕後。
在內地，他於鏡頭前，戴着黑超帶領樂隊昂首步入攝影廠。在香港，他在土瓜灣街頭走來走去，也沒人留意。
「香港都無人識我。」
香港待他不薄，但總不及內地給他的豐厚。
自言最近到銅鑼灣，終多次被認出，不過「都係啲國內嚟買嘢嘅人。」
上星期長沙落大雪，氣溫零度以下，攝影師穿羽絨也冷病，梁翹柏只披上一件薄外套，竟可待上四日三夜。他每天由酒店坐車去湖南衞視，每日工作逾十二小時，就是為了彩排及錄影湖南衞視王牌節目《我是歌手》，所投入的時間，足媲美在紅館搞一場演唱會，只是這場秀僅排練七首歌。這次錄影，梁翹柏想用一把新疆民族樂器，他連樂器的名字都不記得，只在網上看過影片，但開口吩咐一聲，工作人員便找了回來。「基本上諗得到嘅我都可以要，譬如我要加多五個人、要豎琴，要多一個大啲嘅管弦樂，或者我話要一個好大嘅中國大鼓。總之我諗到喺呢隻歌，我想要一班合唱團，二十零人，咁我就可以要。」話說回來，十年前，他曾是無綫節目《勁歌金曲》的樂隊班底，「電視台就係要綜藝節目，歌手要跑步，樂隊擺後面，唱歌都係做樣，譬如我要支笛，香港唔係真係搵支笛，都係彈出嚟。」
長沙三夜
香港人善用蔗渣價錢，踢出燒鵝味道，不求最好，但求最大收益。剛接下《我是歌手》音樂總監一職時，梁翹柏對內地電視台用錢方法感驚訝，「可能我都係香港人，細眉細眼，成日都話：『唉呀，我驚我想要啲人好貴喎。』因為要包埋機票酒店。點知佢話：『貴唔緊要，我驚你個台裝唔晒啫。』」
港人常說大陸浮誇，梁翹柏認為是南北之別，「香港聽南方小調，我哋嘅曲式都係小品，少少悲傷，一啲好微細嘅嘢，無啲幅度大嘅感情，無好誇張嘅，無生死。」有人批評G.E.M.只懂嗌歌，「香港太細，人講嘢溝通，但北方大啲，你講嘢都要大聲啲嗌出嚟啲人先至聽到，少數民族都用歌嚟溝通。」
「事實上你嗌嘅時候，係官能刺激，你會受到感染，唱啲嗌嘅歌、有爆點嘅歌，係會有分嘅。G.E.M.無人識，你突然間『嘩！』咁樣，細細粒又靚女，又唱得，啲人咪覺得好鍾意佢，難保再過多五、六期之後，你會覺得好悶。」
梁文道撰文評港人酸溜溜批《我是歌手》，只因香港已做不出這樣的電視節目，梁翹柏點頭同意：「啱呀，唔係人哋好，係我哋唔好嘛。」
聲大、景大，想必報酬也大，「你當呢個係一個演唱會水平嘅收入，同付出嘅努力囉。」湖南衞視門外，放着紅底黃字須知，說明在場工作人員不能用手提電話通訊，免得賽果外洩。記者隨梁翹柏到長沙做訪問，在港一直有講有笑的他，到埗後緊張得很。記者請他到離酒店三十分鐘車程的步行街拍照，但在酒店大堂準備起行時，他突然拒絕，只拋下一句：「做訪問緊要定做節目緊要？」就回房工作，到後來助手才致電叫記者補拍照片，可見他重視這個節目，猶如一場演唱會。
北京四年
《我是歌手》總導演洪濤兩年前聯絡梁翹柏，約他在深圳見面，「之前已經有好多人（話要做節目），講完就無咗影，我都當佢係其中一個。」他原以為節目開不成，卻在開錄前兩星期突然被告知要埋班。結果第一季已紅遍中國，梁翹柏隨即變得炙手可熱，《中國最強音》、《為中國歌唱》全都找上他監製，他更在《中國音超》當教練。
梁翹柏早在十年前已零散為內地歌手，如鄭鈞等做音樂。周筆暢在○九年簽約香港公司金牌大風，轉會後便找梁翹柏監製，他才把重心移到大陸。「而家好多嘢都係全國性，淘寶店都係全國性，你嘅mind都係全國性諗法，多咗咁大個market，梗係好事啦。」四年前，他接下電視台現場樂隊節目，原計劃每月到北京錄影三次，便在北京五道營胡同租房放樂器，一次過付了數個月租金。計劃卻突然有變，改在廣州錄影，房子丟空。他覺得浪費，有時間便上去住。「嗰陣時我日日踎喺胡同，成條街我都熟晒，飲酒傾偈，無嘢做就坐喺佢哋店門口。」其時胡同租金便宜，吸引了一批年輕人開店，其中一家名叫棟樑，當時是間不足二百呎的小店，專賣內地設計的時裝，現於上海已有一家樓高三層的分店。
「幾年前啱啱住喺大陸時，我無同香港人有任何接觸，我識嘅全部係大陸人，因為我覺得，我要嚟呢個地方，點解仲要搵番香港人？」梁翹柏為練好普通話，手機輸入法由手寫變為拼音。為捉摸內地年輕人口味，上網看他們關心什麼事，「你知唔知咩嘢係開心網？開心網喺微博之前好流行，我以前成日上。」他是最早開微博那批人，見網上遊戲流行種菜、偷菜，他投入到要校鬧鐘起床收割。惟他少看內地報章，「年輕人係唔睇報紙嘅」，梁翹柏行年五十有一，才學做內地年輕人，「因為我哋做音樂係pop culture，係年輕人嘅文化。佢哋語言係乜嘢，口頭禪係乜嘢，我都要知。」內地對幕後音樂人感興趣，有不少關於梁翹柏的報導。訪問前，他先問：「可唔可以寫完之後俾我睇？」原來內地媒體訪問後，都會讓他先批閱，再出街，但這裡是香港，敝刊亦無此習慣。他曾在內地接受訪問，沒查看報導，內容便走樣：「例如話張學友爭住請我飲咖啡，王菲無我就唔開演唱會，又話我戴住頂帽做指揮，但我根本唔戴帽。」以上情節皆虛構，難怪梁翹柏接受訪問前小心翼翼，還用記者電郵作人肉搜尋，「我睇到你鍾意聽band，我覺得OK，起碼你尊重音樂，唔係一個挑八卦嘅人。」記者抹一把汗，慶幸沒讚過林峯。
香港半生
梁翹柏中學開始迷上外國樂隊音樂，與Beyond成員識於微時。他八五年隨父母移民美國，八八年回港，跟退出Beyond的劉志遠組成二人組合浮世繪。翌年推出大碟《愛花的少年》，惜不合港人口味，銷量只得幾千。「張學友嗰時賣緊幾十萬至一百萬，一萬係個可恥嘅數字。」同年，Beyond的《Beyond IV》賣了十萬隻，「Beyond咪紅囉，我唔紅吖嘛，（記：你哋friend底喎？）咁點呀，會帶挈到我咩？梗係唔會啦。」兩年後，唱片公司不續約，他返回紐約，「嗰時諗住音樂無前途，咪讀書囉，但又唔知讀咩，就讀咗電影。」九七年，他在紐約市立大學碩士畢業，拿着幾個劇本回港，想託做電影導演的朋友替他找投資者，卻正值港產片低潮，連導演朋友都轉為拍廣告，「嗰陣時又無CEPA，又無合拍片。」朋友見他找不到工作，便介紹他重回老本行，為盧巧音、張茵等歌手當唱片監製。「細個嗰時一定會覺得懷才不遇，但我諗番，呢個世界無懷才不遇，你自己行啲咩路，係你自己選擇嘅。我可以讀business，我可以讀電腦，讀完之後就可以搵到份好工，咁點解要讀電影？讀完電影你想做導演，根本無人投資，呢啲係你自己揀。嗰時已經估到自己條路係點，咁我點會怨唔好彩呢？」
王菲與梁翹柏曾屬同一經理人，兩人早認識。他為盧巧音監製唱片時，在錄音室巧遇王菲，「我哋傾咗幾句，後來Katie（王菲經理人陳家瑛）就打俾我，話：『阿菲隻碟想搵你做』。」他在○一年監製了大碟《王菲》，其中《光之翼》、《夜會》皆由他作曲，此後他被稱為王菲御用監製，王菲復出演唱會也由他擔任音樂總監。梁翹柏在港樂壇有地位，他卻不時考慮轉行，「我今日做完一張唱片，唔代表仲會繼續有下一個job，可以忽然之間全行都無人搵你，然後你就消失咗。」○七年他和陳海琪合作搞娛樂公司電橙，目標是聯繫中港音樂人合作。「有機會咪試吓做生意，原來唔係好得。」他最愛看到幻想中的場景成形，因此辦舞台劇、拍電影，唯有這次未成形已夭折，「我想咩都試，我真係唔知我想點。」但投資者不支持，公司開張兩年便結業。香港不愛梁翹柏，但內地惜他如金，與其眷戀香港，不如北望神州。擔任電視節目音樂總監外，他還替沙寶亮、韓紅等內地歌手監製唱片。除了做音樂，他在朋友介紹下，於北京工人體育場附近一幢三層高舊樓開畫廊，又投資北京一家湖南菜館。他的母親現居上海，他一個月只回港一次，只剩在美國讀書時認識的日本嬌妻留守香港。問他還有沒有留意香港樂壇，能說得出一個樂壇新人嗎？他想了半晌，問：「連詩雅算唔算新？」其實連詩雅出道已經三年幾，很難說得上是新人了。
