2011版 現實中的黑夜之神

FACE 週刊
TE014-018 | 青雲路 | 2011-10-26
標示關鍵字



2011版 現實中的黑夜之神






80、90後都是夜鬼一族，熱愛夜蒲，常於中環、尖沙咀一帶夜夜笙歌，即使留在家中，亦通宵達旦地上網、打機和煲劇，hea到天光才入眠。但這些糜爛的夜生活，對需要深宵工作的朋友，肯定是種奢侈，像今期訪問3位主角，分別從事夜展社工、深宵節目DJ及路軌維修員，當大家每晚享受閒暇時，他們都正在不眠不休地工作，名副其實是黑夜之神。

Case 1帶iPad四周撩夜青

晚上11時，青協夜展社工Kenneth帶記者來到將軍澳某屋邨停車場，沿暗角處一條5米高的鐵梯攀上閣樓，四周滿布垃圾和塗鴉，「呢個位原本係放水箱，但2、3年前成為咗將軍澳一個單車黨嘅私竇，平時除咗成班人踩住街車周圍兜，就係返嚟呢度煲煙同索K，單車黨個大佬叫阿波，得17歲就成街仇家，平時喺班?面前要扮cool，但其實好鍾意同人講嘢，我成日夜晚搵佢傾偈、請吓佢食飯，好快開始熟絡，佢俾人打時，都識call我揸車去救佢。」

　取得阿波信任後，Kenneth認為阿波本質不壞，需要的只是一個改過的契機，「年幾前阿波因為刑事毀壞俾人拉咗，上庭前一晚，成班兄弟都話撐佢，點知第二日淨係得佢父母同我喺法庭出現，最後阿波被判9個月監，我陪佢阿媽去探監，佢見阿媽膝頭有關節炎都趕去探佢，隔住玻璃唔停咁喊。曾經雪中送炭，令阿波更願意聽我講去改變，出番嚟後，佢真係唔再搵班兄弟，仲成為咗廚師，4月康城青年空間開幕，佢仲幫我哋做義工，煮飯畀60人食！」

四處兜風尋找夜青

Kenneth今年25歲，入行4年，每星期有2、3晚，他會與同事駕車在將軍澳、寶琳、西貢等尋找需要協助的夜青，「未必喺街上玩就等如學壞，可能只不過係同朋友食飯吹水搞到夜咗返屋企，所以要厚住面皮，同啲青少年傾多啲偈，熟絡咗先知有冇需要開file跟進。」

採訪當晚，Kenneth帶着iPad，在尚德邨的公園平台與約10名年約14至16歲的少年雞啄唔斷，「?家興平板電腦，帶部iPad一齊玩吓game，容易打開話題，更重要嘅係，可以隨時用iPad上網幫佢哋搵工，比用print出嚟嘅招聘廣告更快更update。」現場所見，雖然少年嫌iPad 1速度不夠快，但仍迅速與Kenneth打成一片。16歲的豪仔表示：「自己啲感情事好難同屋企人分享，同曾sir（Kenneth）熟咗，有個人聽自己傾偈都幾好。」

常要處理突發意外

深宵在街上漫遊，常遇突發事件，「今年除夕夜，我同同事喺屋邨聽到打鬥聲，跑到埋去，打人嗰班已經上晒的士，剩番一個後生仔瞓低咗，口腫面腫，佢兩個朋友講我聽，先知佢係我識嘅一個19歲後生仔Frankie。」Kenneth與同事分工合作，一邊為Frankie急救及送院、一邊安撫在旁叫嚷要「吹雞覆卓」的兩位兄弟。「嗰晚喺醫院同Frankie家長等到第二朝8、9點，佢先至冇生命危險，先可以休息。」

雖然對工作有熱誠，但Kenneth和同事都有無法解決的問題，「呢區得2、3間茶餐廳開通宵，好難搵嘢食，有時甚至要去便利店叮飯。廁所更加難搵，有同事試過用iPhone個『衝廁』app去搵，去到先發現閂咗門，好多時都要去番餐廳借廁所。」

夜展社工每月要當夜更100小時，薪金不比其他範疇的社工優厚，但Kenneth無悔入行，「工作時間冇咁穩定，健康同社交都差咗，但我想趁自己後生，捱得夜嘅時間去做夜展，因為對好多後生仔嚟講，夜晚先係打開心窗說亮話嘅時機。」

點入行？

無論是夜展、老人或家庭等不同服務範疇的社工，入職要求及薪金都是一樣，但多數非政府機構社工，薪金會比政府社工略低，只有青協等少數機構會跟從政府薪酬。有社會工作高級文憑或副學士者，可成為社會工作助理；有學士或以上社工學位者，可以出任助理社會工作主任。

晉升階梯

社會工作主任 $53,060

（學士或以上學歷，5-10年經驗。）

↑

助理社會工作主任 $23,360

（學士學歷，無需經驗。）

↑

社會工作助理 $15,900

（高級文憑或副學士學歷，無需經驗。）

Case 2《扭錯台》只啱半夜播

夜闌人靜，好多人愛聽收音機，而深夜時分的電台，亦有一番光景。採訪當晚，記者抵達商業電台，直播室只得小貓三四隻，相當冷清，難怪曾傳出靈異事件，DJ EKEE表示：「有次雲海做節目時，阿祖突然成個人呆咗冇出聲，原來佢見到有個人頭周圍飛嚟飛去！之後嗰個月，除咗我之外，幾乎冇人敢用呢間直播室。」

鬧鬼也不怕，皆因EKEE主持的《扭錯台》（星期一至五1am至2am），充滿驚慄和血腥元素，「我好鍾意睇啲血腥cult片，一星期介紹3套，煲完套戲後，我要重新寫過份劇本，錄成廣播劇喺節目度播放，好多人覺得我睇呢啲戲好變態，但其實戲內嘅血漿係假o架嘛，有乜好驚？」

《人形蜈蚣》講屎被禁

EKEE會將血肉橫飛的場面，以趣劇形式廣播，但畢竟是電台節目，不能夠太過火，「我最鍾意一套叫《Brain Dead》嘅美國電影，劇情講男主角個阿媽俾怪獸咬咗一啖，變成喪屍，後來發展到佢屋企有成班喪屍開party，男主角要用電鋸將佢哋全部劈死，雖然血淋淋，但只要唔將啲死法講得太details，都可以出街；反而我提議過講《人形蜈蚣》，但因為講屎比較核突，最後都冇做到。」

年約30歲的EKEE，自小偏好奇異詭秘的事物，「細個畫公仔，其他人畫花花草草，我會畫骷髏骨，仲試過搵繩吊張骷髏骨畫畀住樓下嘅人欣賞。自細不停接觸恐怖片、塔羅牌等奇怪嘢，06年主持第一個節目《妹妹妹妹》時，雖然係少女節目，但我成日講另類恐怖嘢，監製覺得我啱做呢類節目，但呢類節目冇可能喺合家歡時段播，所以我從來都走唔甩要返夜。」

商台附近食肆不多，夜更工作的糧草是一大問題，「商台冇canteen，隔籬港台又超難食，附近餐廳要買滿$100先送外賣，所要湊夠3個人先買到，但半夜通常湊唔夠人，會求其食吓零食，或收工返屋企先食。」

雖然日夜顛倒，但EKEE表示不難習慣，「每日中午起身，食完飯下晝約3點返公司，開始睇戲、寫稿、訪問同錄音，預備好個節目，到凌晨1點開咪時，主要喺直播室播聲帶、報天氣等，收工搭的士返港島區屋企，已經凌晨3點。」不過，可以的話她始終想做日間DJ，「每晚10至2點瞓覺，身體恢復得最好，女仔貪靚，梗係寧願返早啦！」

點入行？

EKEE表示，電台DJ一般都是自薦入行，「我04年參加商台歌唱比賽，喺後台向工作人員自薦，見工時最好交啲創作畀人睇，我嗰時整咗本簿，入面有自己嘅寫作、畫畫、作曲、節目proposal等唔同作品，交乜都得，總之要畀人知道你有創意同個人風格。」

DJ的薪金以月薪計算，身價按知名度而不同，沒一定準則，以政府為香港電台招聘的節目助理為例，起薪約$9,000。另外，電台一般容許DJ在外接job，像EKEE最近亦轉戰歌壇，「我歌唱比賽出身，呢排唱番歌，出咗2隻single，12月會出EP，只要同商台申報就冇問題。」

Case 3路軌維修督導員：好過做地盤！

晚晚深宵工作的黑夜之神EKEE和Kenneth，雖然工作地點附近都有港鐵站，但歸家時肯定不會搭港鐵，皆因港鐵12時多便終止服務，這時候，路軌維修督導員雄仔便要展開忙碌工作，「每日咁多班車行過路軌，自然會出現損耗，每晚同事做完檢查後，都會排期畀我哋更換新路軌。」

港鐵出廠的路軌，一般長18米，但有留意新聞都會知道，港鐵月台及路軌的裂縫，由幾毫米至200米都曾出現，為了乘客安全，絕不可掉以輕心，「我負責做東鐵同馬鐵線的路軌維修，返日班時（8am-4:30pm），我喺火炭車廠預備路軌組件，分配人手將路軌分割、燒焊、鑽窿等。返夜嗰陣（11pm-6:30am），會將整好嘅路軌組件，用機車吊過去有需要嘅路段更換。以前以為啲路軌好硬，唔明點解可以轉彎，做落先知，原來啲鐵柔韌度高，一吊起就會彎 晒，好易裝入路軌！」

日夜輪替難約朋友

30歲的雄仔，夜深工作十多年，逐步由學徒成為督導員，「97年時，我中三畢業，去咗建造業訓練局讀機械維修文憑，畢業後學校介紹我嚟做學徒，train咗3年，正式升做路軌維修員。雖然成日要捱夜，但日日瞓足8個鐘先夠精神，日夜輪班都幾難約朋友，會少咗娛樂，平時主要同同事食飯睇戲。不過公司勝在有免費車搭，算好福利，好過做地盤！」

黑夜中工作，路軌上有足夠照明，問題不大，但刮起狂風暴雨時，工作環境便較惡劣，「如果開工前有紅雨或8號波，我哋唔使喺路軌開工，但試過工作期間有紅雨，我要冒住風雨繼續鋸鐵，整到一半唔做埋落去嘅話，條路線未必可以如期開通。」

近年港鐵常被揭發路軌有裂縫，但雄仔竟自言十多年來都沒有出錯，表現可謂一支獨秀，難怪去年再進一級成為督導員，「由落手落腳做，變為安排工作，暫時啲維修都喺預期內做好，上年8月，路軌出現過突發故障要維修，但我哋都夠後備材料，可以更換路軌。」表現專業，以後搭港鐵時，都要記得這群出色的黑夜路軌維修員。

點入行？

港鐵表示路軌維修員最低入職要求是完成中三學歷及職訓局的維修課程，如無上述學歷者，則要有3年相關的機械維修經驗。入職後可享有港鐵乘車優惠、夜班津貼、醫療保險等福利，而路軌技術員薪金與汽車維修員相若。

晉升階梯

督導員 約$13,000

（5年經驗）

↑

技術員 約$11,000

（3年經驗）

↑

技術學徒 約$9,000

（無需經驗）